الدرس الثاني من سلسلة تأسيس الطفل في اللغة الإنجليزية

الدرس الثاني من سلسلة تأسيس الطفل في اللغة الإنجليزية 

نبدأ الدرس الثاني

Letter B b

أولًا نكون مجهزين البطاقات التالية هنطبعها من أي مكتبة ونغلفها 

نبدأ ببطاقة letter Bb ونقول اسم الحرف للطفل 

ونحكي قصة letter B

في يوم من الأيام ذهب أحمد ونادر إلى النادي وهناك قابلا صديقهم مروان ودعاهم إلى اللعب معه بالكرة  باستخدام المضرب ثمر راحوا يضربوا الكرةة باستخدام المضرب بكل قوتهم (هو ده الأكشن الخاص بالحرف، نلوح بأيدينا يمينًا ويسارًا كأن معنا مضرب)

*ياريت اللي تقدر تحكي القصة بالانجلش يكون أفضل

- نضع بطاقة تلو الأخرى مع ذكر صوت الحرف والكلمة المذكورة في البطاقة،

بالشكل المذكور في التسجيل ده

Letter B b

* هتلاقوا في أخر الشرح فيديو فيه الأكشن الخاص بالحرف :)

* ملحوظة: ياريت تسمعوا صوت حرف B  قبل الشرح وتتفرجوا على حركة الحرف عشان هنحتاجهم طول ما احنا بنشرح لولادنا

*  البطاقات المستخدمة في الشرح

(طريقة تحميل الصور لطباعتها: تقف بمؤشر الماوس على الصورة ثم تضغط كليك يمين ثم save image as) 

الفيديو ده مجمع actions الخاصة بكل الحروف تقريبًا هتلاقوا action of letter B b في الثانية 53

Action of letter B b

طيب ايه هو صوت B b؟

الفيدويوهات التالية بتقدم صوت Letter B b

Sound of letter Bb
The sound of letter Bb

وده فيديو بيعرض أكثر من أغنية من منهج جولي فونكس نشغل بس أغنية حرفB b ونوقفه هي كمان مرتبطة بالقصة اللي ذكرناها فوق لإنها من نفس المنهج
Jolly Phonics

ده درس letter B b  من سلسلة حلوة جدًا بشرح الحرف والكلمات في صورة قصة
Story of Letter B

ودي بعض الشيتات الخاصة بالحرف هتلاقوها متنوعة بين الكتابة وبين تحسين مهارات الكتابة 

أول شيت بيطلب من الطفل وضع دائرة حول الصورة التي تبدأ بحرف Bb

أتمنى يكون الشرح بسيط وأكون قدرت أوصله بشكل واضح، لو في أي أسئلة اكتبوها في التعليقات على الفيس بوك أو المدونة وهرد عليكم إن شاء الله

ياريت تبدأوا مع الولاد وتقولولي لو في أي صعوبات واجهتكم 

الدرس الأول من سلسلة تأسيس الطفل في اللغة الإنجليزية

الدرس الأول من سلسلة تأسيس الطفل في اللغة الإنجليزية 

نبدأ إن شاء الله سلسلة تأسيس الطفل في اللغة الإنجليزية بشكل بسيط
أول حاجة لازم تتوافر معانا box of letters

وده البوكس الخاص بمنتسوري في حال لم يكن متوفر يمكن طباعة الحروف وتغليفها من المكتبة أو استخدام أي بازل
أرجو مراعاة عرض الحرف capital and small للطفل 

نبدأ الدرس الأول

Letter A a

أولًا نكون مجهزين البطاقات التالية هنطبعها من أي مكتبة ونغلفها 

نبدأ ببطاقة letter A aونقول اسم الحرف للطفل 

ونحكي قصة letter A

في يوم من الأيام أسرة جميلة خرجوا للحديقة يلعبوا كانوا مبسوطين جدًا لكن فجأة واحد من الأطفال فضل يصرخ ويقول /a a a/ في نمل ماشي على ايدي 
* واحنا بنقول الصوت نعمل الأكشن معاه
يعني ايه أكشن؟
في منهج جولي فونكس موجود لكل حرف أكشن بنعمله مع الصوت فبالتالي الصوت يثبت بشكل أفضل في دماغ الطفل
طب ايه هو صوت letter Aa
نمشي ايدينا على دراعنا كإن في نمل ماشي على دراعنا ونفضل نكرر الصوت
*ياريت اللي تقدر تحكي القصة بالانجلش يكون أفضل

- نضع بطاقة تلو الأخرى مع ذكر صوت الحرف والكلمة المذكورة في البطاقة،

بالشكل المذكور في التسجيل ده

Letter A a

* هتلاقوا في أخر الشرح فيديو فيه الأكشن الخاص بالحرف :)

* ملحوظة: ياريت تسمعوا صوت حرف B  قبل الشرح وتتفرجوا على حركة الحرف عشان هنحتاجهم طول ما احنا بنشرح لولادنا

*  البطاقات المستخدمة في الشرح

(طريقة تحميل الصور لطباعتها: تقف بمؤشر الماوس على الصورة ثم تضغط كليك يمين ثم save image as) 

الفيديو ده مجمع actions الخاصة بكل الحروف تقريبًا هتلاقوا action of letter Aa في الثانية 45

Action of letter a

طيب ايه هو صوتA a؟

الفيدويوهات التالية بتقدم صوت Letter A a

Sound of letter Aa
The sound of letter A a

وده فيديو بيعرض أكثر من أغنية من منهج جولي فونكس نشغل بس أغنية حرفA a ونوقفه هي كمان مرتبطة بالقصة اللي ذكرناها فوق لإنها من نفس المنهج
Jolly Phonics

ده درس letter A a  من سلسلة حلوة جدًا بشرح الحرف والكلمات في صورة قصة
Story of Letter A

ودي بعض الشيتات الخاصة بالحرف هتلاقوها متنوعة بين الكتابة وبين تحسين مهارات الكتابة 

أتمنى يكون الشرح بسيط وأكون قدرت أوصله بشكل واضح، لو في أي أسئلة اكتبوها في التعليقات على الفيس بوك أو المدونة وهرد عليكم إن شاء الله

ياريت تبدأوا مع الولاد وتقولولي لو في أي صعوبات واجهتكم 

الجزء الأول من الرياضيات/Math

ازاي نحل عقدة الرياضيات/Math  مع أولادنا في كي جي بدون تعقيد؟!

ماريا منتسوري احترمت عقل الطفل وطريقة تفكيره وتعامله مع العالم وأدركت إنه لا يمكن أن يستوعب عقل الطفل تقديم أرقام مجردة دون أن يفهمها 

فاستخدمت أولًا قضبان العد

كل عمود بيشير لرقم وبيتم ترتيب الأعمدة تصاعديًا من الأصغر إلى الأكبر (من 1 إلى 10) بنستخدمهم لتنفيذ أنشطة متنوعة مع الطفل.

بنقدمهم بالترتيب الواضح في الشكل ثم نطلب من الطفل ترتيبهم، هيغلط ويحاول ويجرب حتى يدرك طريقة الترتيب من الأصغر إلى الأكبر. 

نحرص على عد الأعمدة مع الطفل من 1 إلى 10 

ولا يقتصر العد على الأعمدة فقط بل نطلب منه عد المعالق مثلا أو عدد المكعبات أو أي شئ بالمنزل

الطفل دلوقتي أدرك إن العدد 1 يعبر عن كمية أقل من العدد 5 وأن العدد 9 أكبر من العدد 7

وبهذا أدرك الطفل مفهوم أكبر من وأصغر من دون شرح مجرد لا يفهم منه شئ

يمكن استخدام مكعبات باللون الأحمر والأزرق واستخدامها لنفس الأمر

كما يمكن صنع الأعمدة لدى أي نجار 

ويمكن شرائها من أي مكان أخر تتوافر فيه

بعد إدراك كمية العدد

نقدم له رموز الأعداد من 1 إلى 10  من خلال كروت الصنفرة، واشمعن الصنفرة؟ عشان الطفل يمشي على الرقم بايده ويقدر يحس بيه

ودي طريقة صنع الكروت في المنزل 

صنع كروت الصنفرة

بعد أن نقدم له الأرقام نربطها بالأعمدة بالشكل التالي:

كده الطفل قدر يفهم يعني ايه رقم 5 ويعني ايه رقم واحد وهكذا.

في كمان أداة أخرى حلوة ودي بنعرفه من خلالها قيمة الصفر وسهل جدا تتعمل في البيت

ممكن نستخدم صندوق من الكرتون ونكتب عليه الأرقام ونسخدم عصيان خشب للعد

بنقدم للطفل الصندوق والعصي ونعد أربع عصيان نضعهم داخل مكان الرقم 4 وهكذا مع كل الأرقام ونخبره أن الصندوق صفر لا نضع فيه شئ فالرقم صفر يدل على عدم وجود أي شئ

يبقى حتى الآن الطفل أدرك كمية الرقم واتعرف على الرموز وربط الرموز بالكم ثم تعلم كف يمكنه العد وكيف أن الست أشياء يعبرون عن عدد أكبر من الأربعة وهكذا 

بهذا نكون قد انتهينا من الجزء الأول من المفاهيم الأساسية التي درسها الأطفال في الترم الأول بكي جي 1

الاعتماد على النفس والمشاركة في المهمات اليومية بالمنزل

حسب منهج منتسوري يجب تعليم الطفل منذ الصغر الاعتماد على نفسه، فتصمم أرفف الألعاب قصيرة حتى يتسنى له وضع الألعاب وترتيبها بنفسه كما يتم تعليق ملابسه على مستوى قريب منه حتى يهتم هو بنفسه بترتيبها. يجب أيضًا تعليم الطفل ترتيب سريره حتى لو لم يتم هذه المهمة على أكمل وجه يترك لتنفذيها دون تدخل من الأم. كما يتم تحفيزه على الاهتمام بنظافته الشخصية ورعاية الحيوانات.

وايه علاقة ده بديسكفر؟!

ده ملخص الدرس المعروض بالصفحة 18 

يعرض على الطفل عدد من المهمات يطلب منه تحديد المهمات التي ينفذها الوالدين وأي من هذه المهمات يشترك فيها الطفل.

الدرس ده لا يمكن تلقينه للأطفال، فإذا كان مازال أطفالك غير مسؤولين عن أي مهمات في البيت فيمكنك البدء الآن فتطلبي منه عند الاستيقاظ ترتيب سريره. تطلبي منه نقل الأطباق معك إلى الطاولة وترتيب الطاولة لتناول الطعام، وهكذا حتى يعتاد الأمر. وفي هذا لا تفرق ماريا منتسوري بين ولد وبنت الكل يجب أن يشارك.

يجب أيضًا أن يتعلم الطفل رعاية الحيوانات، فنتحدث معه على أن الحيوانات كما عرفها هي كائنات حية تشعر بالألم والجوع والعطش مثلها مثل الإنسان؛ لذا علينا تجنب أذيتها. 

هذا الأمر لن ينتهي بين يوم وليلة سيستهلك فترة من الزمن حتى يستطيع الطفل التعود على تحمل المسؤولية والمشاركة في مهمات المنزل

خلال حديثنا معه عن المهمات في المنزل ومسؤولية كل فرد تجاه البيت الذي يعيش فيه، نسأله كم شخص بالغ يعيش معنا وكم طفل؟ كما في صفحة 17 ونطلب منه أن يسميهم لنا، ونخبره أن هؤلاء هم أسرته وعائلته. 

ننتقل بعد ذلك للحديث عن المدرسة، فنسأله هل يساعد زملائه في المدرسة؟ هل له مهمة محددة داخل الفصل؟ من هم الأشخاص الذين يقابلهم في المدرسة؟ وما هي الأشياء التي يراها في المدرسة

ستختلف إجابات الأطفال 

فنعرض عليه الصفحة 39 ونسأله عن كل شخص هل رآه من قبل أم لا؟ وما هي وظيفته؟ وما الوظيفة التي يحلم بها الطفل نفسه؟

ويمكن أن نتحدث مع الطفل عن الأماكن التي توجد في المدرسة من خلال صفحة 36 و37 و38. 

أطفال الحيوانات وبيئاتهم المختلفة وطريقة تكيفهم (الدرس الثامن)

ثلاث موضوعات مختلفة يطرحها كتاب Discover  سنشرحها بشكل مبسط جدًا

أولًا عرضت على أطفالي بعض كروت الحيوانات وهي من أفضل الكروت التي اقتنيناها استخدمتهم لعمل عدة تصنيفات
الأول ميزنا بين كل حيوان وطفله وأسماء صغار الحيوانات
 (لا تضغطوا على أطفالكم لحفظ أسماء صغار الحيوانات فقط مروا عليها مرور الكرام :))

أول حاجة صنفنا الحيوانات البالغة والصغيرة أو الأم وأطفالها

ثم فتحنا كتاب ديسكفر صفحة 53 ولعبنا لعبة جميلة جدًا 

كل صورة تمثل أم يبحث عنها طفلها 

سألتهم عن أسماء الحيوانات في الصور أولًا، ثم بدأنا نلعب الفزورة

سأخبركم بمواصفات الحيوان الذي يبحث عن أمه وأخبروني أنتم باسم أمه

اتفقنا 

وهكذا حتى انتهينا 

ثم شاهدنا فيديو عن صغير الجمل يحاول الوقوف والمشي هو فيديو ممتع جدًا :)

Baby camel

ثم عرضت عليهم مجموعة أخرى من البطاقات وبدأنا في تصنيفها عدة تصنيفات 

الأولى بين الحيوانات التي تعيش في المزرعة وأخرى في الغابة

الحيوانات التي تعيش على الأرض والتي تعيش في العش والتي تعيش في البحر

بعد ذلك فتحنا ديسكفر صفحة 54 وبدأنا في تصنيف الحيوانات الظاهرة في صفحة 53 بين حيوانات تعيش في الماء وأخرى تعيش على الأرض

ثم شاهدنا عدد من الفيديوهات عن الحيوانات وكنت معهم خطوة بخطوة خلال عرض الفيديوهات أوضح لهم كل معلومة
Giraffes
Sea Turtles
birds
camel
squirrel
bear

من خلال الفيديوهات السابقة بدأنا نعرف معلومات أكتر عن الحيوانات والأماكن اللي بتعيش فيها وازاي بتقدر تتكيف مع المناطق دي 
ثم فتحنا صفحة 55 من Discover  وبدأنا في تصنيف الحيوانات
* ملحوظة الدرس ده ممكن نشرحه على أسبوع مثلًا حسب استيعاب الطفل، احنا مش عايزين الطفل يحفظ؛ بل يستكشف العالم من حوله

بعد ذلك طرحت عليهم سؤال
نحن نحتاج إلى الطعام والشراب والملبس والمسكن حتى نستطيع العيش، ترى ما الذي تحتاج إليه الحيوانات؟
هم أيضًا يأكلون ويشربون وينامون 
بس في حاجات تانية بتساعدهم على الحياة في بيئاتهم
فتحنا صفحة 67 وبدأنا في الاطلاع على الصور وتحديد ما يساعدهم في البقاء على قيد الحياة
مثلًا الجمل 
يمتلك رموش طويلة تحمي عينيه من رمال الصحراء
الدب بيحتاج الفرو جدًا لإنه بيدفيه في الشتاء والمخالب دي بتساعده يصطاد السمك من البحر
حتى الصبار له شوك يحميه من الحيوانات 
وهكذا حتى انتهينا

تطبيقات هذا الدرس من Connect plus
pages 41, 42, 43, 44

Need and Want, Healthy and Unhealthy food and Farmer's tools (الدرس السابع

Need and Want, Healthy and Unhealthy food and Farmer's tools

ثلاث موضوعات يطرحها كتاب Discover and Connect plus بشكل منفرد، لكننا اليوم سنشرحهم بطريقة بسيطة ونربطهم معًا


انتهينا في الدرس السابق إلى وجود أشياء مشتركة بين الكائنات الحية
فعرفنا إن كلهم بياكلوا ويشربوا ويتنفسوا
طيب تخيلوا كده لو فضلتوا عطشانين وجعانين وما بتاكلوش هتقدروا تعيشوا
لأ
يبقى في حاجات أساسية بنحتاجها عشان نقدر نعيش زي المأكل والمشرب
ايه أكتر أكل بتحبوا تاكلوه؟
ستتنوع إجابات الطفل
فنسأله هل هذا الطعام صحي أم ضار (Healthy or unhealthy)
يعني ايه؟
في أكل مفيد جدًا لأجسامنا واحنا محتاجين ناكله عشان يخيلينا أقوياء وأكثر صحة
زي ايه بقى الأكل ده؟
الخضروات والفواكهة واللبن مثل هذا الطعام يمد أجسامنا بأنواع مختلفة من الفيتامينات والحديد والكالسيوم والألياف، أما الأطعمة مثل المياه الغازية والبطاطس المقلية فكلها أشياء تضر بصحتنا.


- درس Healthy and unhealthy food  هتلاقوه في:
connect plus, unit 4, pages 59, 60
Discover Page 73

في حاجة تانية مهمة جدًا عشان نحافظ على صحتنا، وهي النظافة والمحافظة على غسل الأيدي قبل وبعد تناول الطعام
وامتى كمان؟
بعد استخدام الحمام
هناك أيضًا أوقات أخرى نطالعها في كتاب connect plus
التطبيق: 
Discover page71
Connect plus, unit 4, page 61

إذًا فالخضروات والفواكه من الأكعمة الهامة جدًا حتى نحافظ على صحتنا
فمن منكم يعلم من أين نحصل على هذه الخضروات والفواكه الجميلة؟
نشتريها
ومن أين يحصل عليها المحل الذي نشتري منه؟
من الزرع
أحسنتم
ومن يزرعها؟
لا نعلم
يزرعها شخص يسمى الفلاح وهو يستخدم بعض الأدوات التي تساعده في الزراعة
فلنشاهد بعض الفيديوهات التي تشرح لنا أدوات الفلاح وطريقة الزراعة

أدوات الفلاح
Farmer song

طريقة الزراعة
شرح للزراعة مفصل وتوضيحي باللغة الإنجليزية ولكن بلكنة هندية

سؤال أخر يا أولاد
قلنا أننا بحاجة إلى تناول الطعام والشراب حتى نظل بصحة جيدة، فهل هناك أشياء أخرى لا يمكننا العيش بدونها؟
اممم
محتاجين بيت نسكن فيه ومحتاجين كمان ملابس صح؟
صح
لما الجو بيبقى برد بنلبس ملابس تقيلة ولا خفيفة؟
ثقيلة
وفي الصيف بنلبس ملابس خفيفة (مهم نذكر النقطة دي لأننا سنناقش فيما بعد فصول السنة)

طيب تفتكروا لو ما فيش مكعبات نلعب بيها في البيت هنقدر نعيش؟
اه
تمام
طيب يلا نلعب لعبة أنا هاقولكم على حاجات مختلفة وأنتوا تقولوا إذا كانت دي something we need or something we want
ونبدأ نسمي أشياء مختلفة

تطبيق درس Need and Want:
Discover page 50

الكائنات الحية وغير الحية (Living and Non-Living Things) (الدرس السادس)

نحضر صندوقين أحدهم نضع فيه أي جماد متوفر في البيت (أقلام-معالق...إلخ)

ونضع في الصندوق الأخر صور أو مجسمات لحيوانات ونباتات وصورة للطفل

وورقتين واحدة كتب عليها Living things والورقة الأخرى نكتب عليها Non-Living things 

ثم نضع طعام وكوب من المياه وزجاجة صغيرة مليئة بالهواء، ثم نسأل الطفل

ما هذا؟

قلم

هل القلم يتنفس أو يشرب المياه أو يأكل

لا

تمام ضعوه أسفل الورقة المكتوب عليها Non-living things

ما هذه؟

قطة

هل تأكل وتشرب وتتنفس وتكبر

اه

ضعها تحت الورقة المكتوب عليها Living things

وهكذا....

إذًا فالكائنات الحية تأكل وتشرب وتتنفس وتنمو أو تمر بدورة الحياة أما الكائنات غير الحية فهي لا تأكل ولا تشرب ولا تتنفس ولا تكبر.

الفيديو ده حلو في معلومات زيادة ممكن نتجاهلها في الوقت الحالي فقط 

Living and Non-Living things

تطبيق الدرس ده صفحة 62 من كتاب Discover Kg1

ما هو الشئ المشترك بين الكائنات الحية؟ وتطبيقات من كتاب Discover kg1 (الدرس الخامس)

من الأفضل قبل شرح هذا الدرس الشروع في زرع أي نبات في البيت فنحضر تربة ونضع فيها البذور مع الأطفال ونلاحظ  مراحل نموها معهم كل يوم

انتهينا من دراسة أولية لكل أنواع الكائنات الحية من إنسان وحيوان ونبات.

انهارده هنتعرف على الأشياء المشتركة بين النبات والحيوان والإنسان تمهيدًا لشرح فكرة الكائنات الحية وغير الحية
أولًا هنبدأ بمراجعة سريعة على ما سبق ودرسناه.

ثم نعرض عليهم صور أو مجسمات (في حال كانت متوفرة) للحيوانات والنباتات وصورة للطفل ثم نبدأ في طرح الأسئلة؟

تفتكروا ما هي الأمور المشتركة بين الإنسان والحيوان والنبات؟
كلهم بيشربوا مياه وبياكلوا
تمام يبقى الثلاثة بيحتاجوا إلى الطعام والمياه، في حاجة كمان مشتركة إن كلهم بيحتاجوا الهواء.

يوجد أمر أخر مشترك بين الإنسان والحيوان والنبات؟
يبدأ الأطفال في التخمين
نعرض عليه صورته عندما كان رضيعا ونقوله هذا أنت منذ 5 سنوات بص دلوقتي كبرت ازاي.

حلو
فاكرين الزرع بتاعنا كان صغير ازاي؟
اه
وياترى كبر؟
اه شوية
حلو
شوفتوا القطة لما كان حواليها ولادها الصغيرين من القطط وشوفتوهم كمان أما كبروا؟
اه شوفناهم

يبقى الإنسان والحيوان والنبات بيمروا بحاجة اسمها النمو أو دورة الحياة (Life cycle)

ونفتح صفحة 46 في ديسكفر هتلاقوا دورة حياة الإنسان من الأفضل الاستعانة بصور الأب والأم في مراحلهم العمرية المختلفة وعرضها على الطفل أثناء شرح هذا الجزء وصور للطفل عندما كان رضيع وفي مرحلته العمرية الحالية.

أنت في الأول كنت   (baby) كبرت شوية بقى اسمك child وبعدين هتكبر إن شاء الله زي بابا وماما يبقى اسمك adult  وبعدين تكبر  زي جدو فيبقى اسمك old

ملحوظة هامة: مراحل نمو الإنسان هي: baby-child-teenager-adult-old بس هو في كي جي 1 اكتفى بذكر دول بس لقيتي الطفل مستوعب ويقدر يفهم كل المراحل قوليها هيحصل لغبطة يبقى خلينا زي الكتاب

الحيوانات كمان بتبقى زي الطفل الصغير وبعدين تكبر
تعالوا نشوف صور لبعض الحيوانات وهي صغيرة وهي كبيرة ونلاحظ الفرق
هي في ديسكفر بيميزيهم بكلمتين baby and adult

في كمان صفحة 19 و20 و21 في ديسكفر بنفس الفكرة، أما صفحة فبيطلب من الطفل رسم baby animal  وصفحة 27 بيطلب رسم
في كمان صفحة 47 يذكر 3 مراحل عمرية للحصان
في الأول بيكون baby horse
,بعدين يكبر شوية يبقى child horse
وبعدين يبقى adult horse
احنا قلنا إن النبات كمان كان صغير وكبر
صح
فاكرين الزرعة التي زرعناها في التربة حطينا الأول بذرة (seed) كبرت شوية بقت برعم (sprout) وفضلت تكبر لغاية ما شوفنا الزهرة (flower) هي دي دورة حياة النبات

في كمان الفراشات الأول الفراشة بتحط البيض على ورق الشجر بعد شوية البيض ده يفقس وتطلع منه يرقة (caterpillar) وتعد تأكل لغاية ما تكبر وتقوم بانية بيت ليها وتعمل الشرنقة وجوه الشرنقة بتعد تتغير وتكبر حبة حبة فتنمو ليها أجنحة وأرجل وعينين والساقين
دول فيديوهات حلوة وواقعية جدًا
مراحل نمو الفراشة

مراحل نمو الفراشة

التطبيق الخاص بمراحل نمو الفراشة هتلاقوه ف كتاب ديسكفر صفحة 24

تفتكروا في حاجة تاني بتتحول وتكبر؟
 (الضفدع) كمان بيكون مامته بتحط البيض وهو بيفقس ويفضل يكبر 
ده شرح لدورة حياة الضفدع باللغة العربية والإنجليزية لم أزد عليه

دورة حياة الضفدع باللغة العربية
Life cycle of frog

كتاب كونكت بلس فيه دورة حياة الضفدع وفي ديسكفر صفحة 69 فيها مراحل نمو الفراشة والضفدع والفرخة والإنسان

The Plants النباتات الدرس الرابع

The Plants

حتى الآن تعرفنا على:

- الحواس الخمس (Five senses)

- الهيكل العظمي (The Skeleton)

- الفقاريات واللافقاريات (Vertebrate and invertebrate) وعرفنا إن الإنسان من الفقاريات والحيوانات في منها فقاري وفي لا فقاري

بعد ما راجعنا مراجعة سريعة سألتهم؟ 

- تفتكروا النباتات عندها هيكل عظمي؟

Do you think that plants have skeleton?

- لا

-إذا لم يكن لدى النباتات هيكل عظمي فما الذي يحافظ على ثباتها في الأرض دون أن تقع؟

- احتاروا في الإجابة، فعرضت عليهم الصورة التالية:

ويا سلام إذا كان لديك نبات في البيت فتستخدميها في الشرح  

دي الأجزاء الرئيسية في النباتات:

جذور Roots

ساق stem

أوراق leaves

الزهرة flower

الجذور ممتدة تحت الأرض هي كبيرة وقوية حتى تمنع سقوط النباتات والأشجار الكبيرة. الجذور أيضًا تجمع المياه من التربة.

بعد ذلك نرى الساق، وهو الجزء الذي يحمل الأوراق والزهرة ويحافظ عليهم من السقوط كما أنه يساعد النباتات على الوقوف بشكل مستقيم.

لاحظوا: عندما نسقي النباتات بالمياه نضعها في التربة فكيف تنتقل المياه إلى باقي أجزاء النبات؟ 

الساق هو المسؤول عن نقل المياه والمعادن من الجذور وتوصيلها إلى الأوراق.

يبقى النباتات والأشجار مثلها مثل الإنسان والحيوان تحتاج إلى المياه. (مهم جدًا تذكروا النقطة دي).

طيب، تفتكروا النباتات بتاكل؟

طبعًا أول إجابة جاوبوها وبكل ثقة لأ. هي لا تمتلك فم لتأكل به.

بس فكروا مرة أخرى، النباتات تشرب المياه مثلها مثل الإنسان والحيوان على الرغم من عدم امتلاكها لفم، صح؟ 

اه صح

يبقى أكيد بتاكل وكمان بتصنع أكلها بنفسها كما نصنع نحن بعض أنواع الطعام بأنفسنا.

ازاي؟

سأخبركم

احنا عشان نعمل الكيكة ما الذي نحتاج إليه؟

ولإنهم صنعوا كيكة معي من قبل فأخبروني نحتاج دقيق وزبد وسكر وبيض ... إلخ

حلو جدًا، إذا بدون هذه المكونات لن أتمكن من صنع كيكة

طيب النباتات كمان تحتاج إلى مكونات تستخدمها لصنع غذائها فما هي هذه المكونات؟

أول حاجة تحتاج إليها النباتات هو الضوء وممكن تحصل عليه من الشمس

ثاني شئ المياه والمعادن

وطبعًا تربة نزرع فيها النباتات

الضوء وتستطيع النباتات الحصول عليه من الشمس، أما المياه والمعادن فتحصل عليها من التربة

يعني ايه معادن؟

يعني عناصر غذائية مش دايمًا أقول لكم أنكم تحتاجون إلى الكالسيوم من اللبن والحديد من السبانخ وهكذا، النباتات أيضًا تحتاج إلى مثل هذه العناصر الغذائية وتحصل عليها من التربة.

إضافةً إلى ما سبق، فالنباتات تحتاج إلى غاز في الهواء يطلق عليه ثاني أكسيد الكربون

وبدأت الأسئلة: ما هو ثاني أكسيد الكربون؟ واحنا مش بنشوفه ليه؟

طلبت منهم رفع أياديهم بالقرب من أنوفهم ثم يتنفسوا شهيقًا وزفيرًا

هل شعرتم بالهواء؟

نعم

هل رأيتم الهواء؟

لا

نحن لا نستطيع أن نرى الهواء وهو ملئ بالغازات المختلفة

لو أنا في المطبخ أحضر لكم الطعام وسألكم شخص أين ماما؟ هتقولوا ايه؟

ماما في المطبخ تطبخ

حول جدًا يبقى أنا عشان أجهز الطعام بطبخ

طب النبات عندما يجهز طعامه يبقى اسمها ايه؟ اسمها عملية التمثيل الضوئي (Photosynthesis)

طيب النبات حصل على المكونات وصنعت طعامها بعملية التمثيل الضوئي، فما الناتج؟ ما هو الأكل الناتج عن طبخ النباتات لهذه المواد؟

ينتج الجلوكوز والأكسجين طبعًا احنا نحتاج هذا الأكسجين في التنفس.

التطبيق من كتاب discover

هذا الفيديو ممتاز جدًا في شرح أجزاء النبات

Parts of Plants

فيديو أخر عن أجزاء النبات وعملية التمثيل الضوئي

The Plants

فيديو أخر خاص بعملية التمثيل الضوئي

التمثيل الضوئي

-          كده احنا شرحنا الكائنات الحية بشكل مبسط (إنسان وحيوان ونبات)، الدرس القادم إن شاء الله سيكون عن الفرق بين الكائنات الحية وغير الحية. 

الفقاريات واللافقاريات (Vertebrate and invertebrate) الدرس الثالث

الجمجمة والحيوانات الفقارية واللافقارية

وصلنا في التدوينة السابقة إلى أن العمود الفقري  تشكله مجموعة من الفقرات. 

وقبل أن نبدأ في عرض نقطة جديدة على الطفل تأكدوا من استيعابه لما مضى، وفي حال اتضح غير ذلك فتجنبوا البدء في نقطة جديدة. اعرضوا عليه الأمر بشكل جديد وبأفكار جديدة. وبمجرد استيعاب الطفل ننتقل إلى نقطة جديدة كما يلي:

أولًا: أضفت معلومة جديدة على الهيكل العظمي فتحدثنا بشكل مبسط عن الجمجمة.

عرضت الصورة التالية عليهم

وبدأنا النقاش. 

يا ترى هل الوجوه دي مختلفة أم متشابهة؟

Look! at these faces, are they different or similar?

مختلفة؟

كيف؟

هذا بيضاوي وهذا دائري وهذا يشبه المستطيل .. إلخ

This looks like an oval, this looks like a circle

يوجد جزء في جسم الإنسان هو المسؤول عن اختلاف هذه الوجوه، إنها الجمجمة  (The Skull)

your Skull shapes your head and face. It surrounds and protects your brain, and houses your eyes and ears.

الجمجمة هي المسؤولة عن شكل الرأس والوجه. وهي مهمة جدًا لحماية العقل كما يوجد في الجمجمة تجاويف تحمل العينين والأذنين كما يوجد بها الأنف والأسنان.  

استعنت بكتاب جسم الإنسان من الخارج إلى الداخل وعرضت عليهم الجمجمة.

توقفنا عند هذه النقطة ثم انتقلت إلى سؤال أخر.

تعرفنا في المرة الماضية على الهيكل العظمي وأدركنا أن الإنسان من الفقريات، فماذا عن الحيوانات؟

تنوعت الإجابات وتركت لهم حرية الكلام وفي كل مرة أسألهم عن سبب اختيارهم

في الحقيقة توجد حيوانات فقارية وأخرى لا فقارية ولكن الفرق الأساسي بينهما هو أن الحيوانات الفقارية تحتوي على هيكل عظمي داخلي بينما اللافقارية لا تمتلك هذا الهيكل العظمي الداخلي.

ثم بدأت أعرض عليهم صور للهيكل العظمي الداخلي لبعض الحيوانات الفقارية

كالزرافة والنمر والدولفين

أما الحيوانات اللافقارية فهي خاليًا تمامًا من هذا الهيكل العظمي الداخلي مثل قنديل البحر

بعد أن انتهينا عرضت عليهم الفيديو التالي وهو يشرح الفرق بشكل بسيط وواضح
Vertebrate and invertebrate animals

طبعًا عنوان حيوانات فقارية ولافقارية يخض بس تأكدوا إن الطفل مستعد يستكشف ويستوعب بشكل أكبر مما نتخيل، فقط امنحوه فرصة.
العنوان دسم وملئ بالتفاصيل الكبيرة لكني فضلت الاكتفاء بهذا القدر في يوم واحد حتى لا أثقل عليهم.